Мисија и дејност

Институцијата делува во рамките на Пелагонискиот регион, со мисија да:

• – ја aфирмира и развива музичката уметност, 
• – ја збогатува културната сцена со квалитетни програми,
• – овозможи пристапност и континуитет на класичната и камерната музика,
• – ја промовира македонската музичка традиција во земјата и надвор од неа,
• – ги поттикнува новите генерации музичари и публиката преку современи и разновидни пристапи.

Камерниот оркестар се стреми кон современ музички израз, уметничка разнообразност и квалитет, како и кон создавање нови можности за културен развој во регионот и пошироко.

Првични вработувања (2024)

Како резултат на управувањето на Владимир Димовски како ВД директор, во мај 2024 година во оркестарот се вработуваат првите членови:

• Дејан Цветковски – виолончело
• Ангела Димковска – флејта
• Симон Поповски – виолина

По нивното вработување, функцијата ВД директор ја презема Дејан Цветковски, додека Владимир Димовски продолжува да придонесува како надворешен соработник, активно вклучен во уметничкиот и организациски развој.

Со заеднички ангажман, Владимир Димовски и Дејан Цветковски во текот на 2024 година реализираат седум значајни проекти, меѓу кои и два интернационални концерти – во Рим (Италија) и Виена (Австрија), како и повеќе настапи низ државата. Двата меѓународни концерти беа распродадени до последното место и завршија со долг аплауз и стоечки овации.

Проширување на составот (2025)

Во јануари 2025 година, оркестарот се проширува со уште три вработени:

• Валентин Наумов – виолина
• Милена Марковска – виолина
• Љупчо Милевски – виолончело

Во јуни 2025 година, по завршување на ангажманот во Националната опера и балет, Владимир Димовски преминува во НУ Камерен оркестар на Битола, дополнително зајакнувајќи го уметничкиот и институционалниот развој на установата.

Моментално, функцијата ВД директор на НУ Камерен оркестар на Битола ја извршува Љупчо Милевски.

Настани и активности

НУ Камерен оркестар на Битола реализира сопствена програмска дејност која опфаќа:

• класични концерти,
• камерни програми,
• едукативни активности,
• музички проекти и соработки со домашни и меѓународни уметници.

Сите актуелни и минати настани на Националната установа се достапни на посебната страница „Новости“ на веб-страницата на оркестарот, како и на официјалните профили на социјалните мрежи.