На 10 јуни 2026 година, во КИЦ Битола, се одржа концертот „Подиум на млади“, на кој младите солисти од Државното музичко училиште – Битола настапија со поддршка на НУ Камерен оркестар – Битола.

Веќе втора година по ред, оваа соработка им овозможува на младите музичари да го претстават својот талент, знаење и љубов кон музиката пред пошироката публика, настапувајќи заедно со професионален оркестар на големата концертна сцена.

Соработката меѓу НУ Камерен оркестар – Битола и Државното музичко училиште – Битола претставува значајна можност за практично и уметничко надградување на младите солисти. Преку непосредната работа со оркестарот, тие стекнуваат драгоцено сценско искуство, ја развиваат својата музичка зрелост и добиваат дополнителен поттик за понатамошен професионален развој.

Концертот донесе вечер исполнета со младешка енергија, посветеност и внимателно подготвени музички изведби. Младите уметници ја споделија сцената со членовите на Камерниот оркестар, создавајќи заедничко музичко доживување кое ја потврди важноста на поддршката и вложувањето во новите генерации музичари.

Со учеството во проектот „Подиум на млади“, НУ Камерен оркестар – Битола продолжува да ја остварува својата мисија за развој и афирмација на младите таленти, како и за унапредување на музичкиот и културниот живот во Битола.